గత కొంతకాలంగా రాజకీయాలకు దూరంగా ఉంటున్న సీతాదయాకర్ రెడ్డి దంపతులు మళ్ళీ రాజకీయాల్లో యాక్టివ్ కావాలంటూ మక్తల్ పట్టణంలో పోస్టర్లు వెలిశాయి. ఈ పోస్టర్లను ఎవరు అతికించారో సరిగ్గా తెలియదు కానీ ” అసమర్ధులు, అవినీతిపరుల చేతిలో బందీ అయిన మక్తల్ , దేవరకద్ర నియోజకవర్గాల సంకెళ్ళు తొలగించి ఈ నియోజకవర్గాల పూర్వ వైభవం కోసం మీరు మళ్ళీ రావాలి” అని అతికించిన పోస్టర్ లో ఇట్లు మీ అభిమానులు అని ఉండటంతో ఇదంతా సీతా దయాకర్ రెడ్డి అభిమానుల పనేనని తెలుస్తోంది.
టీడీపీని వీడుతున్నట్లు ప్రకటించిన సీతా దయాకర్ రెడ్డి దంపతులు ఏ పార్టీలోనూ చేరలేదు. ప్రధాన పార్టీల నుంచి సీతా దయాకర్ రెడ్డి దంపతులకు ఆహ్వానం అందింది. కానీ వారు మాత్రం ఎటుతేల్చుకోలేకపోతున్నారు. వారి అభిమానులు, క్యాడర్ నుంచి రోజురోజుకు ఒత్తిళ్ళు పెరుగుతున్నాయి. మీ వెంటే మేమూ అంటూ అభిమానులు వరుస ప్రకటనలు చేస్తున్నారు. ఈ క్రమంలోనే సీతా దయాకర్ రెడ్డి దంపతులు త్వరలోనే ఏ పార్టీలో చేరనున్నామనేది ప్రకటిస్తామని వెల్లడించారు.
ఇటీవల దయాకర్ రెడ్డి ఆరోగ్యం బాగోలేదని.. వచ్చే ఎన్నికల్లో పోటీ చేయరని నియోజకవర్గంలో ఆయన ప్రత్యర్ధి వర్గం ప్రచారం చేసింది. తాను వచ్చే ఎన్నికల్లో ఖచ్చితంగా బరిలో ఉంటానని.. తను పూర్తిగా ఆరోగ్యంగా ఉన్నానని వీడియో కూడా రిలీజ్ చేశారు. ఈ నేపథ్యంలోనే సీతా దయాకర్ రెడ్డి దంపతులపై ఒత్తిడి పెంచేందుకు వారి అభిమానులు ఈ పోస్టర్లు అంటించినట్లు అర్థం అవుతోంది. తాజాగా పోస్టర్లు వెలవడంతో ఆయన మరికొద్ది రోజుల్లోనే ఏ పార్టీలో చేరనున్నారనేది అధికారికంగా ప్రకటించే అవకాశం ఉంది.
