రాష్ట్రవ్యాప్తంగా గ్రామాల్లో సర్పంచ్ ఎన్నికల హడావుడి మొదలైంది. ఇప్పటికే ఒక దశ నామినేషన్లు కూడా పూర్తయ్యాయి. ఈ ఎన్నికలు పార్టీలకు అతీతంగా జరగాలి కానీ పరోక్షంగా పార్టీల హడావుడి స్పష్టంగా కనిపిస్తుంది. పార్టీ గుర్తులు లేకపోయినప్పటికీ…స్థానికంగా నాయకులు మాత్రం బల ప్రదర్శన చేస్తున్నారు. ఈ హడావుడిలో బీఆర్ఎస్ పార్టీ చాలా వెనుకబడిపోయింది. తొలిదశ నామినేషన్లు వేసిన చాలా గ్రామాల్లో బీఆర్ఎస్ మద్దతుతో నిలబడేందుకు అభ్యర్ధులు వెనుకడుగు వేస్తున్నారు. ఇండిపెండెంట్‌గా అయినా పోటీ చేస్తాం కానీ బీఆర్ఎస్ మద్దతు వద్దంటూ చెప్తున్నారట అభ్యర్ధులు. కారుపార్టీ మద్దతుతో పోటీ చేస్తే తమకు ఓటమి తప్పదన్న భయం పట్టుకుంది.
ఇక తొలిదశ నామినేషన్లలో కాంగ్రెస్ హవా స్పష్టంగా కనిపిస్తోంది. చాలా చోట్ల కాంగ్రెస్ మద్దతిచ్చిన అభ్యర్ధులే ఏకగ్రీవమవుతున్నారు. ఇక కాంగ్రెస్ మద్దతుకోసం పెద్ద ఎత్తున పైరవీలు కూడా చేస్తున్నారు. కానీ మొదటి నుంచి పార్టీని అంటిపెట్టుకొని ఉంటున్న వారికి, గ్రామాభివృద్ధికి కట్టుబడి ఉన్నవారికే కాంగ్రెస్ మద్దతు లభిస్తున్నది. మరోవైపు ఈ ఎన్నికల్లో బీజేపీ ఊసే వినిపించడం లేదు. మొన్నటి జూబ్లీహిల్స్ ఉప ఎన్నికల్లో డిపాజిట్ కోల్పోయిన ఆ పార్టీ గ్రామపంచాయతీ ఎన్నికల్లో ప్రేక్షక పాత్రకే పరిమితమైంది.